ივანე ჯავახიშვილის სახელობის თბილისის სახელმწიფო უნივერსიტეტის პაატა გუგუშვილის სახელობის ეკონომიკის ინსტიტუტის საერთაშორისო სამეცნიერო
კ ო ნ ფ ე რ ე ნ ც ი ე ბ ი
"ეკონომიკა – XXI საუკუნე"
|
|
|
∘ ანზორ აბრალავა ∘ დავით ფოდიაშვილი ∘ სამრეწველო საწარმოების ეკოლოგიური პასუხისმგებლობის შეფასების ეტაპები ანოტაცია. ეკოლოგიური პასუხისმგებლობის შეფასება კვლავ აქტუალურ პრობლემად რჩება, როგორც სამრეწველო საწარმოებისთვის, ასევე ყველა დაინტერესებული მხარისთვის. საწარმოს ეკოლოგიური პასუხისმგებლობის შეფასება დამოუკიდებლად ვერ განხორციელდება დაინტერესებული მხარეების მიერ საჭირო დროითი და ინფორმაციული რესურსების არარსებობის გამო. ამრიგად, ჩვენი კვლევის ამოცანა იყო სამრეწველო საწარმოების ეკოლოგიური პასუხისმგებლობის შეფასების მეთოდოლოგიის შემუშავება, რომელიც მარტივი და ფართო სპექტრისთვის ხელმისაწვდომი იქნებოდა და არ დასჭირდებოდა მნიშვნელოვანი დროითი ხარჯი. საკვანძო სიტყვები: მეთოდიკა, ეკონომიკური პასუხისმგებლობა, კოეფიციენტი, ანგარიშგება, ეკოლოგიური პასუხისმგებლობა. შესავალი. კომპანიის ეკონომიკური აქტიურობა ეკოლოგიური პასუხისმგებლობის წარმოშობის წინაპირობაა. ეკოლოგიური პასუხისმგებლობის შეფასების მეთოდიკის ქვეშ გვესმის, სამრეწველო საწარმოების ეკოლოგიური პასუხისმგებლობის მდგომარეობის შეფასების მეთოდების ერთობლიობა. შეფასების შედეგები საშუალებას აძლევს სამრეწველო საწარმოებს დაადგინონ დადებითი და უარყოფითი მხარეები ეკოლოგიური პასუხისმგებლობის პრაქტიკაში, ასევე განიხილონ და დაასაბუთონ საქმიანობის მიმართულებები მისი გაუმჯობესების მიზნით. ასეთმა შეფასებამ წარმოდგენა უნდა შეგვიქმნას სამრეწველო საწარმოს, საწარმოთა ჯგუფის ან მთლიანად დარგის ეკოლოგიური პასუხისმგებლობის დონის შესახებ, რომელიც დადასტურებულია შედეგებით, სტატისტიკური მონაცემებით, სოციალური ანგარიშებით და შემდგომი ანალიზის, პოტენციური რისკების გამოვლენის და გადაწყვეტილებების მიღების ინფორმაციულ ბაზას წარმოადგენს. ძირითდი ნაწილი. ეკოლოგიური პასუხისმგებლობის შეფასების შედეგები სამრეწველო საწარმოების ეკონომიკური, ეკოლოგიური და სოციალური საქმიანობის სფეროში გადაწყვეტილების მიღების საფუძველს წარმოადგენს. კვლევის ჰიპოთეზა მდგომარებდა შემდეგში: მიმდინარე პერიოდში სამრეწველო საწარმოთა ეკოლოგიური პასუხისმგებლობის მაღალი დონე მომავალში მათი მაღალი ეკონომიკური შედეგების უზრუნველყოფის გარანტიაა. ჩვენ ვიღებთ ასეთ დაშვებას: ეკონომიკური განვითარება და ეკოლოგიური პასუხისმგებლობა დაკავშირებულია და ერთმანეთზე ახდენს გავლენას. ჰიპოთეზის სანდოობის დადგენის მიზნით, შევიმუშავეთ ეკოლოგიური პასუხისმგებლობის შეფასების მეთოდიკა, რომელიც მოიცავს მთელ რიგ ეტაპებს: ეტაპი 1: კვლევის ობიექტის განსაზღვრა. ობიექტის როლში შეიძლება გამოვიდეს როგორც ცალკეული საწარმო ან სამრეწველო საწარმოთა ჯგუფი, ასევე მთლიანად დარგი. ეტაპი 2: ინფორმაციის წყაროს განსაზღვრა. შეფასებისათვის ინფორმაციის წყაროს შერჩევა პირდაპირ არის დამოკიდებული კვლევის ობიექტზე. თუ კვლევის ობიექტია დარგი - ინფორმაციის ძირითად წყაროს წარმოადგენს სტატისტიკური მონაცემები, რომლებიც ხელმისაწვდომია სტატისტიკური ინფორმაციის ოფიციალურ საიტებზე. თუ ობიექტის როლში გამოდის კონკრეტული საწარმო ან საწარმოთა ჯგუფი, მაშინ მიზანშეწონილია გამოვიყენოთ სოციალური (არაფინანსური) ანგარიშგება, რომელიც, როგორც უკვე განვსაზღვრეთ, კორპორაციულ დონეზე სამრეწველო საწარმოების ეკოლოგიური პასუხისმგებლობის განხორციელების ერთ-ერთ ძირითად ინსტრუმენტს წარმოადგენს. ეტაპი 3: მაჩვენებლების განსაზღვრა, რომლებიც კვლევის ემპირიულ ბაზას წარმოადგენს. კონკრეტული სამრეწველო საწარმოს ეკოლოგიური პასუხისმგებლობის შეფასების ფარგლებში, როგორც ჩანს, შესაძლებელია მხოლოდ სოციალურ (არაფინანსურ) ანგარიშგებაში გამოქვეყნებულ არსებულ მონაცემებზე მუშაობა და მათი გაერთიანება ერთ ინდექსში. ამრიგად, საჭიროა დადგინდეს სამრეწველო საწარმოს ეკოლოგიური პასუხისმგებლობის მაჩვენებლები, რომლებიც გახდება კვლევის ემპირიული საფუძველი ამ მეთოდოლოგიის ფარგლებში. ჩვენი აზრით, ეკოლოგიური პასუხისმგებლობის შეფასების მაჩვენებლები ძირითადია იმ საწარმოებისათვის, რომლებიც აცხადებენ თავიანთი ეკოლოგიური პასუხისმგებლობის შესახებ და მათი გამჟღავნება არ წარმოადგენს მნიშვნელოვან საფრთხეს კონკურენტული პოზიციების მოპოვებისა და შენარჩუნებისათვის. ძირითადი პრობლემა, რამაც გაართულა სამრეწველო საწარმოების შეფასება და შედარებითი ანალიზი, იყო სოციალური (არაფინანსური) ანგარიშგების დამახასიათებელი განსხვავებები ინფორმაციის გამჟღავნების დონესა და ფორმატთან დაკავშირებით. ნებისმიერი სამრეწველო საწარმოს ანგარიშგებაში და დარგის განვითარების სტატისტიკურ მონაცემებში მნიშვნელოვან ადგილს იკავებს ეკოლოგიური ასპექტი. ეს არის ყველაზე განვითარებული და აღიარებული, მოიცავს გარემო ბუნებაზე ზემოქმედების დინამიკის კვლევას: ატმოსფეროში გამონაბოლქვი, წყლის ობიექტებში ჩამონადენი, ნარჩენები და სხვა. კორპორაციულ ანგარიშებში წარმოდგენილია ინფორმაცია გარემობუნებაზე წარმოების მავნე ზემოქმედების შემცირების ინიციატივის შესახებ და ასევე მოცემულია ინვესტირებული თანხების ოდენობა. ეკოლოგიური პასუხისმგებლობის კომპონენტები კომპოზიციური მაჩვენებლის (ინდექსის) განსაზღვრის მიზნით უნდა იყვნენ საკმაოდ ინფორმატიულნი. მათ უნდა ასახონ ყველა მნიშვნელოვანი მოვლენა. სამრეწველო საწარმოების ეკოლოგიური პასუხისმგებლობა ამ მეთოდოლოგიის ფარგლებში წარმოდგენილია შემდეგი კომპონენტებით: გარემოსდაცვითი ღონისძიებების ხარჯები; ატმოსფერული ჰაერის დაცვა; ნარჩენების მართვა; წყლის რესურსების დაცვა; მიწის სამელიორაციო სამუშაოები. ეკონომიკური განვითარება წარმოდგენილია 3 კომპონენტით: ფინანსური, საგანმანათლებლო და საინვესტიციო. ეტაპი 4: შებრუნებულ მაჩვენებლად გარდაქმნა. აღსანიშნავია, რომ რაც უფრო მაღალი იქნება შემოთავაზებული მაჩვენებლების მნიშვნელობა მით უფრო დადებით ან საწინააღმდეგო -უარყოფით გავლენას მოახდენს სამრეწველო საწარმოების ეკოლოგიური პასუხისმგებლობისა და ეკონომიკური განვითარების დონეზე (ცხრილი 1 და 2). |